أنت كده ;)

  

وعلي غرار أعلان عم عزت أبو عوف بتاع المحسوكين
أبعت انا كمان شويه تحيات بس من غير ما أشل حد :))

 ~ تحيه ~
لكل أم عرفت تربي بجد
عرفت تعلم ولادها معني الأصول
عرفت تعلمهم أزاي يصونوا العشره

~ تحيه ~
  لكل أب مقبلش فلوس حرام علي ولاده
أستحمل المرمطه عشان ولاده يطلعوا احسن ناس
شاف الويل عشان عارف انه مفيش احسن من الذريه الصالحه

~  وتحيه ~
 لكل أبن عارف قيمه أبوه وأمه
عارف انه ما وصلش للي هو فيه الا بتعبهم
تحيه ليه وهو بيستحمله زعيقهم فيه وخنقتهم
تحيه له عشان عارف انهم تعبوا اوي عشانه
ولازم يرد لهم الجميل

 ~ تحيه ~
لكل واحد أتظلم ولما جتله فرصه يستقوي علي اللي ظلمه
ما استقواش وسامح عشان عارف انه ربنا اقوي

~ تحيه ~
   لكل واحد سهل ان يعمل فتنه ويوقع الناس ببعضها
ومعملش دا عشان عارف  ان الدنيا مش هتدوم
ويوم ما يقابل وجه كريم الدين هيكون تقيل أوي عليه

~تحيه ~
 لكل واحد لسه بيراعي ربنا في شغله وما بيزوغش
اول ما رئيسه يلفت
ولا بيقبل بيجي متأخر وزمايله بيمضوا له ولا بيقبل  ياخد علاوات مش من حقه

~ تحيه ~
 لكل موظفه بتخلص مصالح  الناس وهي مبتسمه في وشهم
مش بتنكد عليهم وتطلع هم المروحه البايظه عليهم
وتحيه بقي أكبر لحبايبنا اللي بطلوا يااخدو كيس الخضار الشغل
وعرفوا انه ربنا هيحاسبهم علي الوقت اللي بيضيعوه

~ تحيه ~
وتحيه مني مخصوص لكل واحد بيقطع تذكره مترو
وهو عارف انه مبقاش في حد يفتش ولا بقي في سور للمحطه اصلا
وتحيه للشباب اللي زي السكر اللي بيقوموا يقفوا لما يلاقوا حد محتاج يقعد اكتر منهم

 وتحيه~
  للي بيدي الغلابه صدقه من غير ما يمن عليهم ولا يحدفهم بكلمه
تحسسهم انهم اقل منه
وتحيه للي لسه بيعملوا الخير عشان خاطر ربنا مش عشان يكبروا في عين الناس

وأحلي ~ تحيه ~ لدول
تحيه لزينه الشباب اللي مربين دقنهم سنه مش عشان الناس تحترمهم
,وهما بجد قمه الاحترام
وتحيه للشباب اللي عاملين شعرهم اسبايك والحلوين اللي مش بيغسلوا شعرهم او مكرهبينه
بس وقت ما بنت شارعهم تتعاكس بيكونوا رجالتها

وتحيه ~
  لكل عيل صغير ما بيضربش الكلاب اللي في الشارع بالطوب
ولا بيرمي صواريخ علي البنات وهما ماشيين
ولا بيقولهم *اوعي*ويركبهم الهوا وفي الاخر يعتذر ويقولهم اسف يا مزه
يعني من الاخر تحيه لكل طفل طبيعي مش عاهات زي اللي بنشوفهم اليومين دول

وحطوا انتوا بقي التحيه اللي عايزين توصلوها للي بقوا نادرين اوي في زمنا دا  من وجهه نظركم