~ حبه اسبرين بقي عشان افهم الليله ~

كنت رايحه أعزي والأسود 
مخليني مش طايقه حتي نفسي 
صداع هيموتني ..مفيش حبه اسبرين ؟
قدام بيتي في بيت
وقدام البيت الف حيط
يا حلاوتك يا ميكروباص الهنا
اخيرا شرفت
تقريبا هنركب فوق الشبكه  
أركبي يا بنتي .. خلاص يا حجه ركبت

يا تري عملت ايه ليوم الحساب
بافكر وفجأه كان عمري كله 
كان سراب 
معملتش حاجه !!
ما حيلتيش حاجه ومعملتش حاجه 
لا  أستني ما حلتيش الا ~التراب 
وهو ربك لما يسترد أمنته هاحتاج ايه 
غير تربه وشويه تراب  

وعملي الصالح يشفعلي يوم الحساب 
قول يا بااااااسط

وعماله دماغي تجيب وتودي والسواق بيزعق
اللي هيقف قدام الميكروباص هاخبطه
دووووسهم ابوس ايدك  خليه عزا جماعي 
بس سبني مع نفسي اخد وادي 

وفجأه صواريخ وهيسه وزيطه
وناس بترقص قدام الميكروباص 
وعاملين زمباليطه
شيلنا الدقن المستخبيه في الدين
خلي البلد بقي تنضف محنش ناقصين

عمو السواق  بيزعق تاني
محدش يبقي بقي يعيط لما ادوسه
وانت ياض  اطلع علي الرصيف

هيييييه شيلنا مرسي  
قال كان بيقول سواقين الميكروباص دول حبايبي
يبقي يركبله توكتوك بقي من هنا ورايح
عملنا ايه .. بيفكر في قدس 
واسد  بيدبح في مليون شهيد 
وأحنا اللي فينا مكفينا يا بويا 


بيقولك عروبه .. عروبه ايه ونيله ايه
واحنا مش عارفين نأمن لا بيوتنا ولا عرضناايوه ما يقدر علي القدره الا ربنا
ودا اللي عايزه لازم يكون وراه ايد من حديد

صح يا حجه واحنا يدوبك نتلم  علي 
ماتش ولا برنامج ونبقي مليون
بس مليون * فارغ * بيرقصوا ولا 
كأنهم يوم العيد 

حد يسكت الناس دي 
يا دي النيله تليفون اللي ورايا بيرن
يا جماله .. صاحبه من رابعه بيكلمه
ايوووه يا شويه خرفان مغيبين 
اديكم غرقتم مع الخروف بتاعكم 

مفيش حبه أسبرين ؟ 
دماااااغي هتنفجر 

لا نور ولا ميه و الزباله  هي كمان
في كل حته مرميه
اه يا ابني والله وشويه بلطجيه 
متحامين في الدين والناس غلابه جعانين
وعيالنا بتصرخ حتي حبه اللبن
  ليهم مش لاقين

يااا لهوي ..بقي هو الخروف هو اللي كان
سبب في دا كله ؟؟؟
طب الحمدلله انه طلع خروف وضحيتوا بيه
أقله مش هيعيش بذنب الجزار
اللي جبنه ورا سكاكينه مخبيه

السواق ما شاء الله مكمل
مش فارق يخبط حد ولا لا
بقالنا ساعتين في الطريق  يا جدعان 
وانا يا حج في عيل صغير قدامك
ياض ابعد يخرب بيتك هيخبطكم
ياااااا لهوي السواق مجنون

ط ب بص يا أسطي علي جنب بقي  ونزلني

الناس كلها مضايقين .. طبيعي ما دا عزا
ايه الجنان دا من فرح علي عزا
ومن رقص لدعاء للميت 
والله  عندي كاني جيت من عزا لعزا
الله يرحمك يا بلدي
يا بختك يا عم أحمد مت وأرتحت
البقاء لله .. الدوام لله
يلا يا بنتي عشان نروح 

والنبي يا ماما نركب المترو 
لا لا يا بنتي هنركب ميكروباص 
يااااااااا مرك يا نعمه
طب ثواني بقي اشتريلي شريط اسبرين

المزه مطلعه العلم من شباك الميكروباص
والامور اللي جنبها منشكج اوي 
بيب بيب مصر  ..
كملت واحد مجنون واقف جنب شباكي
الحمدلله انه يحدث نفسه .. يخرب بيتك انا ناقصه رعب

يلا انكشحت الغمه
لا يا عم والله كان مسلي قال يدوبك 
   150  كلمه الشرعيه
مرهلا يا ماما متدخليش في النقاش ابوس ايدك
الحجه نفضتلي
ليه يا ولاد دا كان غلبان  وطيب يا عين امه
بس مينفعش يحكم بلد  أصله طيب اوي


عمنا الحشري : انتي اللي طيبه يا حجه 
الناس دي عارفين عايزين ايه بالظبط
هما كان اللي مربيهم السادات
دول اخرتهم يتحطوا في المعتقلات
شويه البلطجيه دول 

ليه يا ابني ما دول ولادنا في الاخر
كفايه بقي يا ماما
محدش معاه أسبرين ؟
 
المدام اللي ورايا  بتهمهم ..
وجوزها بيحاول يسكتها وفي الاخر
البلاعه اتفتحت 
يا جدع اسكت دول عالم عايزين الضرب بالجزم
طول عمرهم ماشين بالكرباج 
ولما حد أدلهم الحريه 
قالوا  اؤدوه دا هو والاديشه هيقلبوها لنا اسلاميه

قال خايفين يخلي الرجاله تربي دقنهم
والستات تلبس النقاب
نقاب ايه يا اخويا اللي خايفين يلبسوه
دا النسوان عندنا وشوهم ولا وش الغراب 
هو في حد بيغصب حد علي حاجه في البلد دي

الناس هاجت .. في حد هيضرب النهارده
ياااا رب استر

عمو سكتها الحمدلله
يا ستي مرسي كان حلو وكل حاجه
وكان هيحكم بالشرع والدين بس كان .. عبيط
كان في أيد الاخوان لعبه وعامل لنا نفسه حويط
قلنا له بلاش اخوان .. واهم باعوه 
وغرقت بينا كلنا ولاد .. التيت

علي عيني وعلي راسي يا سيدنا
بس فينها الشرعيه وفين أحترام الدوله
وحكم الاغلبيه ؟

الكل بيضحك علي كلمه شرعيه
وصاحبنا بيقول انا قعدت عدتها 
في الخطاب ودماغي لفت .. هم يضحك وهم ...يصدع

عايز تكلم عن الديمقراطيه هاقولك انا فين الديمقراطيه
بس قولي فين دم الشهيد ؟
وازاي نواسي ام من ثوره يناير  مستنيه العيد
العيد عندها يوم ما تاخد بتار ولادها
يوم ما تعرف  في رقبه مين دم الشهيد

العداله مشلوله والقضاه قابضين 
ومبارك وولاده خارجين خارجين

يبقي  اقولك ايه هي الديمقراطيه
يوم ما العداله تنطق ويشيل قضاتها من عليها  اللجام
يوم ما تقول .. زغرطي يا أم الشهيد وقومي افرشي الصوان
خدي عزا ولادك وسط الميدان

يعني هو كان قتلهم ؟
حقهم مش عنده يابا 

لا حقهم مش عنده 
مش عنده هو وبس لا حقهم في رقابينا كلنا
وهو كان عايز يبقي مسئول عننا
يبقي كان أولي بيه يجيب حقنا

صداااااااااع .. أسبرين 
طب مسدس اطخ بيه نفسي  واخلص  .. ممكن ؟
صواريخ تاني وعيال صغيره حوالين العربيه
بيشتموا .. 
ماشيناه يلعن ابوه ويلعن أبو الشرعيه

يا نهار أسود .. أنت يا ابني عندك كم سنه؟
الواد مكملش 15 سنه
وشكله لا بيعرف يكتب ولا يقرا 
شرعيه ايه اللي بيكلم عليها
شرعيه ايه وسياسيه ايه اللي الناس بتحكي فيها

مش عارفه يومها ليه انا خفت
ومسكت في كم امي وصرخت
أنا فين ومين دول 
وفين بلدي راحت ؟
هو انا مت ؟؟؟؟؟؟

والواد دا ليه فرحان اوي كده  وهو مش فاهم حاجه؟ 
فرحان عشان بيرقص و بيلعب بس بالصواريخ ؟؟
 
وامي بتهديني وبتضحك 
يا بنتي انتي اصلا ملكيش في السياسه
مضايقه ليه دلوقت

صوت الصواريخ  .. مش مستحملاه 
خلصت بقي انا عرفت الصداع دا من ايه
الصواريخ !!!

ايوه صاروخ  جهل ضربوه علينا
وقبله صاروخ فقر وصاروخ  لناس ماسكه في الدين
وصاروخ فتنه .. الفتنه
مسلم مسيحي كلهم مغيبين 
هو يعني ايه كلمه مغيبين اصلا يا ماما ؟

 يعني عقلهم في غفله بس
انتي  زعلانه ليه يا بنتي ؟


الفتنه يا أمي اشد من القتل
وعمر ما في كف هيبني وطن وصوابعه مبتوره

دا اخوان ودا ملحد ودا سلفي
ودا مسيحي ودا علماني ودا فلول ودول خرفان 
ودا وطني  ودا اصله نور ودول  بقي حريه وعداله 

كفايه فرقه بقي .. ما يمسكنا خروف ولا حتي بهيم
يحكمنا 4 سنين ولا يحكم ليوم الدين
يبقي في دستور ولا ميبقاش
مش فارقه .. اللي فارق عندي
انه  ميبقاش في .. فرقه

وزي ما قلت قبل كده 
الفرقه خيبه ... وذله كمان
وعمر الفرقه ما بنت أوطان
حد فهم حاجه ؟؟