قالوا كتكوت صغنتوت
مش مشكله هنعرف
مش مشكله هنعرف
نلبسه العمه ولا الزعبوط
دا ياما كان ضعيف وجبان
كان لما بيتكعبل في ظله .. بيطب يموت
صدقوا اني كتكوت عشان
يوم عشموني بعماير وبيوت
ولا حتي تربه تلمني يوم ما اموت
وطلعت انا عبيط وصدقت
وطلعوا هما اندال و سبوني
ومن يومها من الحسره بموت
ولا اكمني صدقتك يا باشمهندس
اه قالوا عليك بكالريوس زراعه اد الدنيا
هو دا اللي هيصون ارضنا ويكتر زرعنا
واخرها سممت ارضي ومكلتش انا غير القفا
وانا بكع دم قلبي في شويه
الخضار بالمبيد اللي بيهم سرطنتني
ولا انت يا دكتور يلي استوردت لي
كل امراض الدنيا في حته لحمه
وسبتني ياما اكل لحمه كلاب وقرود
لحد مبقش عارف ليه
انا كل يوم حد من اهلي بيموت
فعلا انا كنت اضعف من الكتكوت
بس مش علشان انا ساكت ..
تفكروني مليش صوت
لا انا ياما صرخت
وعمري بيضيع في طابور العيش
ارحموني .. يا خلق .. ياهو
رجلي من الوقفه اتهرت
مش كنتم ساعتها بتسمعوني وقلتوا عليا
شحات .. جعان
ويوم ما بوست الايادي علشان الاقي لي
سرير ارقد عليه
بعد ما بيتي فوق راسي اتهد
يوم ما رمتوني في الشارع
في عز البرد ولا كاني حيوان
مش كنت ساعتها باصرخ وباقول
ارحموني دا انا زيكم .. أنسان
ولا يوم ما اتظلمت وعلي البورش نمت
بحجه ايه .. فكروني ارهابي اكمني بدقن
ويلا بقي سوري علي الكم سنه اللي
عذبناك فيهم
اهو لسه قدامك باقي العمر عشان تعيشه زي زمان
زي زمان ؟!
لا انا ياما عديت زمان
بس النهارده ماتوا اهلي عشان
يكتبوا لثوره الحق اذان
خلوني رافع راسي زي زمان
خلوني انسان
يعني مبقاش في ابن فلان وابن علان
خلاص عدي زمن
اللي كان جيبه بالوسايط .. مليان
واللي كان كرشه بالرشاوي .. طخنان
يعني خلاص عدينا زمن التماثيل والخرص والعميان
ما هي امي قالتلي يومها
اللي عايز يفوت في الحديد بيفوت
وهي بيكون كبيرها ايه يعني
علقه وهتفوت
بس خليك انت ديما انسان
خلي لك غصب عن الكل صوت
معدتش ابقي كتكوت
ولا عمره حرق كنيسه ولا مصنع ومول
هترجعني اخرص زي زمان
ان شاء الله حتي تعملي
فتنه طائفيه كل يوم
وباقول كلامي وانا اده
عمري ما هاضعف وارجع ندمان
ومن النهارده هيبقي ليا عقل كبير
وكمان هيبقي عندي ضمير عمره ما هيموت
وهارجع حقي ولو فاضل في عمري
ثواني واموت
ما هو خلاص قولناها صريحه ..
ولي زمن الجبروت ..
0 comments
إرسال تعليق